Lain nang Manyahut

SALAWAS bagawi di kantur, walaupun jabatannya tukang antar surat wan susuruhan urang, tapi Palui kada kalah wan pagawai lainnya.

Pakaiannya saban hari necis kaya kapala seksi, rambutnya disurui rapi kada dikira kalu inya itu pagawai honor bulanan haja.

Jadi pagawai itu nang panting panampilan, jangan mantang-mantang pagawai randahan lalu muha pina kusut, ujar Palui.

Ikam itu nyaman manyambat karna biar gaji sadikit tapi mintuha nang manjamin, sahut Garbus.

Gaji sadikit atawa gaji banyak sama haja habisnya, tapi nang panting kita harus bisabisa maaturnya, jangan sampai ujar paribahasa ganal pasak pada tihang, balas Palui.

Kalu kaya itu ikam cagar kawa jadi pagawai honor taladan saumur hidup, sahut Garbus.

Aku kada hakun jadi pagawai honor saumur hidup, itu artinya kadada paningkatan, sahut Palui. Kita biar haja hidup sadarhana tapi nang panting saraba cukup, baisian sapida motor biar haja buruk, baju salawar salambar dua tapi barasih, dirumah baisian tivi walaupun hitam putih. Kaya itu jua biar rumah buruk tapi ada tilponnya,” ujar Palui baagak.

Imbah tuntung manyambat tilpon, Palui langsung badiri mainjam tilpon di meja kapala seksinya, lalu mamutar numurnya.

Hallo....hallo.....ini rumah kaluarga Paluikah, disini Palui ujarnya.

Ya.....ya....bujur haja, suara bibinian manjawab.

Sudah masakkah nasi gasan makan siang, lalu apa iwaknya? ujar Palui baagak wan Garbus nang mandangarakan dihiganya.

Nyaman banar ikam Lui ai, batakun makan siang haja mamalui tilpon, ujar Garbus.

Jaman moderen ini kita harus maumpati kamajuan jangan katinggalan, ujar Palui. Lalu sambil baagak pulang Palui baucap di tilpon : hallo.....hallo......kaya apa malam tadi........? ujar Palui banyaring pandir.
Malam tadi nang mana ...... ?! ujar jawaban tilpon suara bibinian dirumahnya.
Puas kalu.......? ujar Palui. Napanya nang puas?
Itu naaaahhh....... nang bagagantian diatas, sahut Palui.

Bangsat bapandir jangan carubu, manyupanakan banar, ujar sahutan tilpon.
Hallooo.....halloooo.... ini siapa? Biniku si Zaleha kalu? ujar Palui batakun.
Ikam bujur-bujur kurang ajar Lui ai wani wan mintuha bapander kaya itu, ujar jawaban suara di tilpon. Mandangar jawaban itu Palui jadi gugup karna sama sakali kada mangira nang manyambut tilpon itu adalah mintuhanya.
Haa.....lloooo....hallo.... ujar Palui manggitir baucap handak minta maaf wan mintuhanya. Tapi kadada jawaban lagi nang kadangaran hanya suara bakajut mahantak gagang tilpon.

Kanapa Lui maka ikam pina bapucat-pucat imbah manilpon tadi? ujar Garbus batakun.

Mintuhaku nang manyambutnya, sidin sarik, aku talanjur mambuka rahasia kalambu sahut Palui kakalahan. (bpt/tam)

banjarmasinpost.co.id

Posted by Unknown on Wednesday 4 December 2013 - Rating: 4.5

Title : Lain nang Manyahut
Description : SALAWAS bagawi di kantur, walaupun jabatannya tukang antar surat wan susuruhan urang, tapi Palui kada kalah wan pagawai lainnya. Pakai...

Tweet